Kappelli Maltin

Ikteb lil:

Merħba lilkom fis-sit tagħna

Meta wieħed idur u jgħarrex madwar il-gżejjer tagħna, apparti t-tempji l-kbar, insibu wkoll ammont kbir ta’ kappelli u knejjes żgħar imxerdin ma’ Malta kollha. Wieħed isib dawn il-kappelli kemm fiċ-ċentri kif ukoll fit-truf ta’ l-irħula, fil-kampanja, u wkoll fl-inqas postijiet li tistenniehom bħal f’widien, għoljiet, f’għerien li mhux faċli tilħaqhom u saħansitra f’xifer l-irdum.

L-għan ta’ dan is-sit huwa li jagħti informazzjoni u jżid l-apprezzament ta’ dawn il-kappelli u knejjes żgħar. Sa ftit snin ilu konna naraw ħafna kappelli u knejjes tal-kampanja mitluqin, kważi waslu biex jaqgħu. Illum hawn moviment sħiħ ta’ restawr ta’ ħafna minnhom. Wieħed jieħu gost jara kappelli li wara li ġew restawrati, reġgħu ġew fl-istat oriġinali tagħhom. F’dan is-sit issibu informazzjoni fuqhom, xi leġġendi ħelwin li nsibu marbutin magħhom, kif ukoll ritratti li juru l-ġmiel, fis-sempliċità tagħhom.

Nirringrazzjawkom bil-quddiem,

Id-Direzzjoni.

Libsa Ġdida ...

fittex fis-sit www.kappellimaltin.com

Kulħadd kultant ikun irid ibiddel il-libsa. Jew għal xi festa, jew għal xi okkażjoni jew inkella biex iħossu aktar aġġornat mal-moda tal-mument. Dan jgħodd mhux biss għall-ilbies li nilbsu iżda wkoll bil-mod kif wieħed jesprimi ruħu u kif jikkomunika mal-oħrajn. It-teknoloġija ukoll tagħti lok għal tibdil kull tant żmien.

Il-website tagħna ilu madwar ħames snin imtella’. Il-kontenut tiegħu qed jiġi dejjem irraffinat u aġġornat kull meta jkun hemm xi nformazzjoni ġdida – dan hu il-vantaġġ ta’ sit elettroniku fuq l-istampa mitbugħa. Iżda dehra tas-sit baqgħet l-istess kif kienet ħames snin ilu u d-direzzjoni tas-sit ħasset li wasal iż-żmien li din il-libsa wkoll tinbidel.

Bħalma libsa tista’ tinbidel fuq persuna li tibqa’ l-istess, il-kontenut tas-sit tagħna wkoll mhux ser jinbidel għajr li jiġi miżjud u aġġornat skont il-ħtieġa bħalma dejjem qed nagħmlu. Iżda il-libsa l-ġdida ser tagħtih dehra ġdida

aktar attrajenti, moderna u aġġornata ma’ dak li wieħed ikun imdorri jara meta jħuf siti oħrajn fuq l-internet.

Il-kulur ser jinbidel u l-blu skur ħafna ser ikun qed jintuża ta’ spiss ħalli jaqta’ mal-abjad li ser jiddomina l-paġni fejn ikun hemm il-kitba. Id-disinn ser ikun sempliċi iżda li jolqot l-għajn mingħajr użu ta’ xinxilli. Fejn qabel is-sit kien iddisinjat għal resolution ta’ 800x600 (għax dak kien l-istandard dak iż-żmien), illum is-sit ser ikun iddisinjat għal resolution ta’ 1024x800, li hija l-aktar waħda użata bħalissa. Peress ukoll li qed jidħlu monitors wisgħin, is-sit ser ikun iċċentrat fil-browser sabiex ikun jidher sew kemm fuq monitors standard kif ukoll monitors wiegħsa. Din ir-resolution tagħti wkoll possibiltà li r-ritratti jkunu akbar. Ser isir ukoll xi tibdil fil-qafas tal-istruttura tas-sit innifsu biex jiġu eliminati il-ħafna buttuni żejda li għandna fil-Home Page. Il-menu ser ikun fin-naħa ta’ fuq u mhux fil-ġemb sabiex iħalli l-ispazju kollu għall-kitba u l-illustrazzjonijiet. Ser nieħdu wkoll is-suġġeriment ta’ xi wħud u ser ikun hemm lista waħda ta’ kappelli – dawk li jkollna kitba fuqhom ser juru hyperlink għall-faċċata relevanti.

Għal dan l-għan, inxtara software ġdid biex ikun jista’ jagħmel użu minn teknoloġija aktar moderna. Iżda x-xogħol jieħu l-ħin ukoll, għax hemm madwar 200 faċċata li jridu jiġu aġġornati. S’issa ġew aġġornati madwar 30 paġna, bħalma huma dawk tal-listi u oħrajn. Dan qed jagħti spazju għal sperimentar bi stili differenti sakemm wieħed jimbarka foq il-kappelli nfushom.

Intant, ix-xogħol fuq is-sit l-antik ma ntelaqx u ser jibqa’ jiġi aġġornat b’kappelli ġodda sakemm is-sit il-ġdid jitlesta u jittella’ minfloku. Meta ser ikun lest ? Ma nafux għax hemm ħafna xogħol u l-webmaster mhux din is-sit biss għandu bħala interessi fil-ħajja. Iżda biex naqtgħulkom il-kurżità, qed nagħtukom screen-shots ta’ xi wħud mill-paġni hawn.